Kabirdham District : पुरातत्व विभाग के तकनीकी टीम भोरदेव मंदिर के करिस निरीक्षण, चाउर-फूल चढ़ाये के होही मनाही

अंजोर.कवर्धा, 16 सितम्बर। राज्य शासन के संस्कृति अउ पुरात्व विभाग के टीम डहर ले कबीरधाम जिला प्रशासन के रिर्पोर्ट के आधार म छत्तीसगढ़ के ऐतिहासिक भोरमदेव मंदिर के संरक्षण अउ संवर्धन के दिशा म जल्दी काम शुरू करे जाही। येकर तइयारी शुरू हो गे हावय। 

फणीनागवंशी काल, 11वीं शताब्दी म बने छत्तीसगढ़ के ऐतिहासिक, पुरात्व,पर्यटन अउ धार्मिक जन आस्था के केन्द्र भोरमदेव मंदिर के परिसर अउ गर्भगृह म बरसात के पानी के रिसाव अउ मंदिर के बाहरी भाग के क्षरण के वास्तविक कारण के पता लगाये के खातिर जिला प्रशासन के रिपोर्ट म पुरात्व विभाग के टीम ह मंदिर परिसर के अवलोकन करिन। संस्कृति अउ पुरातत्व विभाग के डिप्टी डायरेक्टर अमृत लाल पैकरा के अवलोकन टीम म चार अलग-अलग तकनीकी विशेषज्ञ ह बारिकी ले निरीक्षण करिन। निरीक्षण टीम म पुरात्व विभाग के सहायक अभियंता सुभाष जैन, उप अभियंता दिलीप साहू, केमिस्ट विरेन्द्र धिवर, मानचित्रकार चेतन मनहरे अउ जिला प्रशासन तनि ले कवर्धा एसडीएम विनय सोनी, डिप्टी कलेक्टर रश्मी वर्मा, बोडला तहसीलदार अमन चतुर्वेदी सामिल रिहिस।  

पुरात्व विभाग के संयुक्त टीम ह भोमदेव मंदिर परिसर अउ आसपास क्षेत्र के बारिकी ले अवलोकन करिन। अवलोकन के बाद टीम ह कलेक्टर रमेश कुमार शर्मा ल भोरमदेव मंदिर परिसर के गर्भ गृह म पानी के रिसाव, बाहरी भाग के रक्षण होए के वास्तविक कारण बताइन। 

पुरात्व विभाग के विशेषज्ञ के टीम ह बताइन के छत्तीसगढ़ म 11 वीं शताब्दी काल म बने अउ येकर समकालिन आन मंदिर के तुलना म भोमरदेव मंदिर के स्थिति बहुत ही अच्छा हावय। कुछ कारण ले पानी के रिसाव होत हावयं, येकर रिपोर्ट विभाग ल दे जाही। विशेषज्ञ मनके टीम ह भोरमदेव मंदिर के संरक्षण अउ संवर्धन के दिशा म मंदिर के उपरी भाग के विशेष साफ सफाई, पत्थरा के जोड़ ल फेर फिलिंग करे अउ विशेष कोडिंग के खातिर रिपोर्ट बनाये हावय। तकनीकी विशेषज्ञ के टीम ह मंदिर के गर्भगृह के बाहरी भाग म चाउंर अउ केमिकल युक्त गुलाल, चंदन अउ वंदन लगाये के खातिर प्रतिबंध करे के बात कहे हावय।