मिनीमाता ल पुण्यतिथि के मउका म सुरता करिन मुख्यमंत्री

अंजोर.रायपुर 11 अगस्त। मुख्यमंत्री दाऊ भूपेश बघेल ह छत्तीसगढ़ के पहिली महिला सांसद मिनीमाता के पुण्यतिथि 11 अगस्त म ओला नमन करिन हावय। मुख्यमंत्री ह किहिन हावय के सरल अउ सहज व्यक्तित्व के धनी मिनीमाता ह मानवता अउ समाज सेवा के खातिर अपन पूरा जीवन सउत दे रिहिस। असम म जन्मे मिनीमाता बिहाव के बाद छत्तीसगढ़ के जन-जीवन म रच-बस गे। उंकर जूझई ले संसद म सामाजिक उत्थान के केऊ कानून बनगे। दलित मनके नागरिक अधिकार के रक्षा के खातिर अस्पृश्यता निवारण अधिनियम ल संसद म पारित कराये म ओमन महती भूमिका निभाईस। 

ओमन मानव कल्याण, नारी उत्थान, किसान, मजदूर, छूआ-छूत निवारण कानून, बाल विवाह, दहेज प्रथा, निःशक्त अउ अनाथ के खातिर आश्रम, महिला शिक्षा अउ छत्तीसगढ़ के खातिर आंदोलन जइसे जनहित के केऊ बुता म जरूरी योगदान दीस। मजदूर मन ल एकजुट करे के खातिर ओमन छत्तीसगढ़ मजदूर संघ के गठन करिन। मुख्यमंत्री ह किहिन हावय के मिनीमाता ह महिला अस्मिता ल एक नवा ऊंचाई दीस हावय। उंकर सुरता म छत्तीसगढ़ सरकार ह समाज अउ महिला मन के उत्थान म जबर योगदान के खातिर मिनीमाता पुरस्कार के स्थापना करे हावय। राज्य म हसदेव बांगो बांध ल मिनीमाता के नाम ले पहचान दे गे हावय। मिनीमाता के सेवाभावी अउ प्रेरणादायी व्यक्तित्व सदैव सुरता करे जाही।