राज्य खेल पुरस्कार के खातिर 7 अगस्त तक आवेदन

अंजोर.रायपुर, 20 जुलाई। छत्तीसगढ़ शासन खेल अउ युवा कल्याण विभाग डहर ले हरेक साल खिलाड़ी, प्रशिक्षक ल खेल पुरस्कार दे करके राज्य खेल अंलकरण ले सम्मानित करथे। ये पुरस्कार राज्य के खातिर उत्कृष्ट प्रदर्शन करे वाला खिलाड़ी, प्रशिक्षक ल दे कथे। येकर खातिर विभाग डहर ले 7 अगस्त तक आवेदन आमंत्रित करे गे हावयं। आवेदन खेल अउ युवा कल्याण विभाग के जिला कार्यालय या संचालनालय म राज्य खेल संघ ले अनुशंसा सहित आवेदन करार तिथि तक कार्यालयीन बखत म जमा करे जा सकत हावयं। आवेदन पत्र के प्रारूप मय विज्ञापन विभाग के वेबसाइट www.sportsyw.cg.gov.in म उपलब्ध हावय।

शहीद राजीव पाण्डे पुरस्कार - राष्ट्रीय चैम्पियनशिप म या राष्ट्रीय खेल म कोनो पदक पाये हो या अधिकृत अंतर्राष्ट्रीय प्रतियोगिता म देश के प्रतिनिधित्व करे हाही ओला दे जही। शहीद कौशल यादव पुरस्कार - येमा जूनियर वर्ग के राष्ट्रीय चैम्पियनशिप म कोनो पदक पाये हो या अइसे खिलाड़ी जेन मन पाछु 5 साल म चार बार सीनियर वर्ग राष्ट्रीय चैम्पियनशिप म छत्तीसगढ़ तनि ले प्रतिनिधित्व करे होही ओला दे जाही। अइसने शहीद पंकज विक्रम सम्मान ले सम्मानित करे जाही। 

वीर हनुमान सिंह पुरस्कार – येमा खेल ले जुड़े 55 साल या जादा उमर के अंतर्राष्ट्रीय खेल प्रतियोगिता म भाग ले हो या राष्ट्रीय प्रतियोगिता म पदक मिले होही उंकर गुरू ल प्रदान करे जाही। इही रकम शहीद विनोद चौबे सम्मान ले तको अलंकृत करे जाही। येकर अलावा मुख्यमंत्री ट्राफी तको दे जाही। 

पुरस्कार के नियम छत्तीसगढ़ राजपत्र म प्रकाशित करे गे हावय, नियम ले पात्रता रखइया आवेदक ल पुरस्कार के खातिर प्रावीण्यता के आधार म चयन करे जाही।

शहीद राजीव पाण्डे पुरस्कार बर 03 लाख रूपिया, शहीद कौशल यादव पुरस्कार बर एक लाख 50 हजार रूपिया, वीर हनुमान सिंह पुरस्कार बर एक लाख 50 हजार रूपिया, शहीद विनोद चौबे सम्मान अउ पंकज विक्रम सम्मान बर 25-25 हजार रूपिया के नगद पुरस्कार दे करिन जाही। इही रकम ले सीनियर अउ जूनियर वर्ग के दलीय खेल के खातिर मुख्यमंत्री ट्राफी दे जाही, जेमा अइसे दलीय खेल जेकर सदस्य मन के संख्या 04 हावय, ओला सीनियर वर्ग म दू लाख रूपिया अउ जूनियर वर्ग म एक लाख रूपिया के पुरस्कार दे जाही अउ अइसे दलीय खेल जेमे सदस्य मन के संख्या 04 ले जादा हावय, ओला सीनियर वर्ग म 5 लाख रूपिया अउ जूनियर वर्ग म 3 लाख रूपिया के पुरस्कार दे जाही। पुरस्कार के अतिरिक्त मानपत्र, अलंकरण फलक, ब्लेजर अउ टाई दे जाही।