मुख्यमंत्री भूपेश कका के बड़का घोषणा : निजी स्कूल के लइका ल तको मिलही ‘महतारी दुलार योजना’ के लाभ

अंजोर.रायपुर, 14 जून 2021। मुख्यमंत्री भूपेश बघेल ह आज एक बड़का घोषणा करत किहिन हावय के कोरोना महामारी ले अपन माता-पिता या अभिभावक ल गवाये लइका जेन निजी स्कूल म पढ़ रिहिन उंकर पढ़ाई के खर्च भी छत्तीसगढ़ सरकार उठाही। अइसे लइका ल राज्य सरकार डहर ले सुरू करे गे महतारी दुलार योजना के लाभ मिलही। प्राइवेट स्कूल म पाछु एक साल ले पढ़त अइसे लइका उही निजी स्कूल म या स्वामी आत्मानंद इंग्लिश मीडियम स्कूल म अपन इच्छानुसार पढ़ सकही। राज्य सरकार डहर ले उंकर स्कूल के फीस के वहन करे जाही।

जानबा होवय के छत्तीसगढ़ सरकार डहर ले कोरोना महामारी ले मरे मनखे मन या पालक के अइसे लइका जेन शासकीय स्कूल म पढ़त रिहिस ओला नि:शुल्क शिक्षा अउ मासिक छात्रवृत्ति दे के खातिर महतारी दुलार योजना सुरू करे गे हावय। मुख्यमंत्री के ए घोषणा के बाद अब शासकीय स्कूल के संग-संग प्राइवेट स्कूल म पढ़त अइसे लइका जेकर माता-पिता या पालक के कोरोना महामारी ले मउत हो गे हावय ओला महतारी दुलार योजना के लाभ मिलही।

महतारी दुलार योजना के लाभ-

महतारी दुलार योजना के तहत छात्र ल कक्षा पहिली ले 8वीं तक 500 रूपिया प्रति महीना अउ कक्षा 9वीं ले 12वीं तक एक हजार रूपिया प्रति महीना के छात्रवृत्ति दे जाही। स्कूल शिक्षा विभाग डहर ले महतारी दुलार योजना के क्रियान्वयन के संबंध म बताइन के स्कूल शिक्षा विभाग, स्वास्थ्य विभाग अउ समाज कल्याण विभाग के समन्वय ले अइसे लइका ल ए योजना के लाभ दिलाए जाही। छत्तीसगढ़ महतारी दुलार योजना 2021 शैक्षणिक सत्र 2021-22 ले लागू हावय। योजना के लाभ छत्तीसगढ़ के मूल निवासी परिवार ले संबंधित बेसहारा लइका ल मिलही। ए योजना के पात्रता शर्त म अइसे लइका जेकर परिवार ले कमाने वाला महतारी या पिता या दुनों के मृत्यु कोविड-19 ले होगे हो ल येकर लाभ मिलही।

योजना के तहत पात्र पाए गे लइका ल प्रदेश के शाला म फोकट म शिक्षा उपलब्ध कराये जाही। अइसे पात्र लइका ल राज्य शासन डहर ले संचालित स्वामी आत्मानंद अंग्रेजी माध्यम स्कूल म प्रवेश म प्राथमिकता दे जाही अउ उंकर शिक्षा के सरी व्यय राज्य शासन डहर ले वहन करे जाही। येकर संग ही छात्रवृत्ति भी दे जाही। बेसहारा लइका के संबंध म कोनो भी स्त्रोत ले कलेक्टर के जानकारी मिले होए म, कलेक्टर जिला शिक्षा अधिकारी के उपलब्ध कराही। येकर अलावा पढ़ईया स्वयं या अभिभावक डहर ले जिला शिक्षा अधिकारी ल सोज आवेदन कर सकही। मिले आवेदन पत्र के परीक्षण के खातिर जिला शिक्षा अधिकारी के अध्यक्षता म समिति गठित होही, जेमा स्वास्थ्य विभाग अउ समाज कल्याण विभाग के एक-एक अधिकारी नामांकित करे गे हावयं। समिति के अनुशंसा म जिला कलेक्टर डहर ले स्वीकृति दे जाही।