अंजोर.रायपुर। कोरोना के दूसरइया लहर के संग ही प्रदेश म टीकाकरण के जोर हावय। पहिली टीका कोरोना वारियर्स मन बर अइस ओकर बाद 45 बछर ले आगर उमर वाले ल लगिस। अब तिसरइया टीकाकरण 18 ले 44 तक वाले मन ल लगत हावय। जानबा होवय के प्रदेश सरकार कोति ले ये टीकाकरण म पहिली गरीब मनला प्रथमिकता देवत अंत्योदय अउ प्राथमिकता कारड वाले के टीकाकरण शुरू करे हावय।
सरकार के यहू कहना हावय के टीका कमती मिले हावय जब जादा संख्या म डोस मिलही ल तको सबो ल लगाये के उदीम करे जाही। ये बीच सरकार के गरीब वाले फॉर्मूला म कइ झिन मन विरोध तको करत हावय। सोशल मीडिया म सरलग ओमन येला ऊंच-नीच, जात-पांत वाला टीकाकारण काहत हावय।
हाल ही म प्रदेश के बड़का नेता पूर्व मंत्री अउ कुरूद विधायक अजय चंद्राकर ह ट्वीट करके केहे हावय के- पूरा विश्व म हॉटस्पॉट म रहइया या फ्रंट लाइन के लोगन ले मिलत-जुलत हावय उनला पहिली टीकाकरण करे जाथे, अइसे हमन सुने रेहेन। फेर ऊंच-नीच, जात-पांत वाला टीका सिर्फ छत्तीसगढ़ म लगाये जाथे। ओमन आगू किथे के- जोन ऊंच-नीच, जात-पांत ल नइ माने ओमन ले गेलौली हावय के 1200 रूपिया वाला टीका आये तक बीमार झिन पड़े अउ ईश्वर म विश्वास रखें।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।