कुदरगढ़ मेला म दरस करइया के मनाही अउ बैगा ल अनुमति, ऑनलाइन होही माता के दरसन

अंजोर.सूरजपुर। अनुविभागीय दण्डाधिकारी भैयाथान ले मिले ओरा मुताबिक एसो जिला के धार्मिक ठउर कुदरगढ़ म चैत्र नवरात्रि म कुदरगढ़ी माता के पूजा अर्चना परंपरानुसार एहू साल करे जाही, फेर वैश्विक महामारी कोविड 19 के संक्रमण के सेती श्रद्धालु मनके स्वास्थ्य सुरक्षा चुनौतीपूर्ण बुता हावय। महामारी के ए कठिन दौर म पाछू साल सहिक कुदरगढ़ मेला आयोजन करे जाना उचित नइ होवय। कुदरगढ़ माता के पूजा अर्चना परंपरागत रीति-रिवाज ले सीमित संख्या म पुजारी, पुरोहित, बैगा मनके उपस्थिति म करे जाना हावय। ए बेरा म पूजा अर्चना सम्पन्न करइया अधिकृत मनखे मनके ही मंदिर म प्रवेश के अनुमति होही।

कुदरगढ़ी माता मंदिर म पूजा अर्चना परंपरागत रीति-रिवाज ले सम्पन्न कराये सरी जिम्मेदारी मुख्य कार्यपालन अधिकारी, जनपद पंचायत ओड़गी अउ सचिव लोक न्यास कुदरगढ़ के होही। ए साल कुदरगढ़ मेला आयोजन प्रतिबंधित होए के महत्वपूर्ण फइसला लिये गे हावय। जेमा मंदिर, मेला परिसर म श्रद्धालुओं, दर्शनार्थियों के आगमन पूरा प्रतिबंधित होही। परिसर म कोनो भी रकम के कार्यक्रम आयोजन नइ होही। परिसर म हाट बाजार नइ लगाये जाए। मंदिर परिसर म कोनो रकम के तस्वीर लेना (फोटो खिंचना) पूरा वर्जित रइही। माता के दर्शन लाईव टेलीकास्ट के माध्यम ले कराये जाही। नियम के पालन नइ करे म 1000 रूपिया के जुर्माना लिये जाही। फइसला के परिपालन म 09 अप्रैल 2021 ले आगामी आदेश पर्यन्त तक मंदिर अउ मेला परिसर पूरा बंद रइही।