अंजोर.रायपुर। मुख्यमंत्री दाऊ भूपेश बघेल ह आज कोविड-19 ले बचाव के टीका लगवाये अउ पंडित जवाहर लाल नेहरू स्मृति चिकित्सा महाविद्यालय रायपुर म टीकाकरण बेवस्था के जायजा ले खातिर पहुंचिस। ओमन टीकाकरण खातिर पहुंचे लोगन ले गोठबात तको करिन। रायपुर के फाफाडीह ले टीका लगवाये बर आये 86 बछर के श्रीमती शारदा बेन ह मुख्यमंत्री ल बताइन के वोमन आज कोरोना वैक्सीन के दूसरा डोज लगवाये बर आये हावय।
ये मउका म श्री बघेल ह उहां टीकाकरण खातिर पहुंचे आन लोगन ल टीकाकरण के बाद भी मास्क के उपयोग अउ शारीरिक दूरी के विशेष ध्यान रखे ल किहिन। मुख्यमंत्री दाऊ भूपेश बघेल ह पंडित जवाहर लाल नेहरू स्मृति चिकित्सा महाविद्यालय म कोविड-19 ले बचाव के टीका के पहिली डोज लगवाइस। ओमन प्रदेश के जम्मो जनता ले टीका लगवाये अपील तको करे हावय।
ए बखत छत्तीसगढ़ गृह निर्माण मंडल के अध्यक्ष कुलदीप जुनेजा, महापौर एजाज ढेबर, रायपुर मेडिकल कॉलेज के डीन डॉ. विष्णु दत्त, डॉ. भीमराव अम्बेडकर अस्पताल के अधीक्षक डॉ. विनीत जैन अउ मुख्य चिकित्सा अउ स्वास्थ्य अधिकारी डॉ. मीरा बघेल अउ डॉ. नरेश साहू संग मेडिकल स्टाफ के टीम तको उपस्थित रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।