गोमर्डा अभ्यारण्य म साम्हर के अवैध शिकार : आरोपी ल मुखबिर के आरो म वन अमला करिस गिरफ्तार

अंजोर.रायपुर। वन मंत्री मोहम्मद अकबर के निर्देश म राज्य म विभाग डहर ले वन अपराध के रोकथाम के खातिर लगातार अभियान चलाए जात हावय। इही तारतम्य म पाछू दिन रायगढ़ वन मंडल के बरमकेला वन परिक्षेत्र अंतर्गत गोमर्डा अभ्यारण्य म विद्युत करेंट बिछाके साम्हर के अवैध शिकार करइया दू फरार आरोपी ल बरमकेला के रेंजर सुरेंद्र कुमार अजय, वनपाल हीरालाल नायक के नेतृत्व म वन विभाग के टीम मुखबिर के आरो म घात लगाके आधा रात के भालूपानी ले गिरफ्तार करिस। ये टीम म वनरक्षक हीरालाल चौधरी, कर्मसिंह राठिया, उग्रसेन नायक, नंदलाल खड़िया अउ बल्लाराम शामिल रिहिन। पकड़े गे दोनों आरोपी परमानंद बरिहा, पिता- हीरालाल बरिहा अउ शनिराम बरिहा, पिता- दयाराम बरिहा ग्राम भालू पानी के रहइया हावय। जबकि दू आन आरोपी संतोष अउ प्रेमलाल फरार हावय, जेकर पतासाजी करे जात हावय। इंकर खिलाफ पूर्व म भी अवैध शिकार के 2 प्रकरण न्यायालय म विचाराधीन हावय।

वन मंडलाधिकारी रायगढ़ डॉ. प्रणय मिश्रा के बताती गोमर्डा अभ्यारण अंतर्गत 19 मार्च ल जंगली जानवर साम्हर के विद्युत करेंट प्रवाहित करके अवैध शिकार करे गे रिहिस। 19 मार्च ल वन अपराध के तहत प्रकरण पंजीबद्ध करके दूनो आरोपी ल न्यायालय म पेश करे गिस। जिहां न्यायालय के आदेश ले वन्य प्राणी साम्हर के शिकार म संलिप्त दोनों आरोपी ल जेल भेज दिये गिस।