आर्मी भर्ती रैली के पहिली दिन साढ़े तीन हजार अभ्यर्थी पहुंचिस

अंजोर.दुर्ग। जिल म चलत आर्मी भर्ती रैली म पहिली दिन लगभग साढ़े तीन हजार अभ्यर्थी उपस्थित रिहिस। ये मउका म प्री-हाइट खातिर लगभग 2000 लोगन क्वालिफाई करिन। संग म लगभग 270 अभ्यर्थी मन दउड़ म क्वालिफाई करिन। ये मउका म प्रदेश के आर्मी रिक्रूटमेंट के डायरेक्टर, सेना मेडल, कर्नल एस. रमेश के मानिटरिंग म भर्ती रैली होवथे। भर्ती ठउर म सुविधा के निरीक्षण करे खातिर कलेक्टर डॉ. सर्वेश्वर नरेंद्र भुरे तको पहुँचिन। ओमन अधिकारी मनला अभ्यर्थी मन के जरूरी सुविधा के सरलग मानिटरिंग करे के निर्देश दिस। ओमन बताइन के सुविधा खातिर हेल्पलाइन नंबर बनाये गे हावय। ये हेल्पलाइन नंबर म जेन मन सहायता के बर फोन करथे उंकर बिगर देरी करे सहायता सुनिश्चित करे जाए। 

अभ्यर्थी मनके रेहे खाए के बेवस्था करे गे हावय। उहाँ साफ-सफाई के मुकम्मल सुविधा रखे जाए। साथ ही खाये-पीये के सुविधा के भी ध्यान रखने के निर्देश दिसे। ये बखत अपर कलेक्टर बीबी पंचभाई, एसडीएम खेमलाल वर्मा अउ उपसंचालक जनशक्ति नियोजन राजकुमार कुर्रे, मेजर सुलेमान हुसैन तको उपस्थित रिहिन। जानबा होवय के सेना भर्ती बखत शुरू म प्रतिभागी मनला मार्शलिंग एरिया म रखे गे हावय। फेर ओकर बाद ओमन ला भर्ती ठउर म ले जाये जाही। अभ्यर्थी मनके सुविधा खातिर शहर म जगा-जगा फ्लैक्स लगाये गे हाबे अउ सोशल मीडिया या आन माध्यम ले अभ्यर्थी मनके रूके के बेवस्था के जानकारी दे गे हावय। कंट्रोल रूम म तको अधिकारी के ड्यूटी लगाये गे हावय जेन सरलग अभ्यर्थी मनला जरूरी जानकारी देवत हाबे।