गोबर खरीदी के पहिली भुगतान 5 अगस्त के ऑनलाइन खाता म होही, गौठान म बनही उच्चक गुणवत्ता के कम्पोस्ट खाद

रायपुर.30। मुख्यमंत्री श्री भूपेश बघेल के मंशा अनुसार गोबर बेचइया मनला 15 दिन के भीतर अनिवार्य रूप ले भुगतान सुनिश्चित करे जाही। ये बात के फैसला गोधन न्याय योजना के सचिव स्तरीय बइठका म लिये गीस। हितग्राही मनला 5 अगस्त के पहिली भुगतान हर हाल म करे के निर्देश जिला कलेक्टलर ल दिये गे हावय। 1 अगस्त तक बेचे गोबर के पइसा सबके बैंक ऑनलाइन जाही ए सेती खाता खोले निर्देश तको दे गे हाबे। सबो गौठान समिति के खाता कॉपरेटिव बैंक म अनिवार्य रूप ले खोले जाही। 

मुख्य सचिव ह बैठक म किहिन के गोधन न्याय योजना के अंतर्गत गोबर बेचइया मनके समय-सीमा म भुगतान सुनिश्चित करे खातिर मुख्यमंत्री के निर्देश म अधिकारी मनके एक उच्च स्तरीय समिति अपर मुख्य सचिव वित्त अमिताभ जैन के अध्यक्षता म बनाये गे हाबे। समिति म पंचायत, ग्रामीण विकास विभाग के प्रमुख सचिव, कृषि विभाग के सचिव, कृषि उत्पादन आयुक्त, सहकारिता विभाग के सचिव शामिल हावय। मुख्य सचिव ह किहिन के जिला कलेक्टर ल कोनो प्रकार के समस्या आए म अपर मुख्य सचिव वित्त अउ समिति के आन सदस्य ले सम्पर्क स्थापित करके समस्या के निराकरण कर सकत हाबे। ये सबो अधिकारी मन प्रतिदिन जिला के कलेक्टर ले गोबर विक्रता खातिर ऑनलाईन भुगतान के मॉनीटरिंग करही।

ये मउका म गोबर के सुरक्षा सुनिश्चित करत गोठान म वर्मी टांका अउ वर्मी बेड बनाके ओकर ले उच्च गुणवत्ता के वर्मी कम्पोस्ट खाद तैयार करे के बात तको केहे गे हावय। येकर बर जिला के गौठान म आन-आन विभाग के मैदानी अधिकारी मनला नोडल बनाये जाही। जे मनला अलग-अलग चार-पांच गौठान के जिम्मेदारी दे जाही। गौठान म शेड, वृक्षारोपण तको करे जाही जेमा आम, बरगद, पीपल, बहेड़ा संग आन फलदार पौधा सामिल रइही। 

सचिव स्तर के समीक्षा बइठका म प्रमुख रूप ले पीसीसीएफ राकेश चतुर्वेदी, अपर मुख्य सचिव वित्त अमिताभ जैन, मुख्यमंत्री के अपर मुख्य सचिव सुब्रत साहू, प्रमुख सचिव पंचायत ग्रामीण विकास गौरव द्विवेदी, उद्योग विभाग के प्रमुख सचिव मनोज पिंगुआ, मुख्यमंत्री के सचिव सिद्धार्थ कोमल परदेशी, कृषि सचिव कृषि उत्पादन आयुक्त डॉ.एम.गीता, सहकारिता विभाग के सचिव प्रसन्ना आर, नगरीय प्रशासन विभाग के सचिव सुश्री अलरमेल मंगई डी. जी मन तको कलेक्टर मनला गोधन न्याय योजना के खातिर जरूरी व्यवस्था के संबंध म जानकारी दीस।