छत्तीसगढ़ के मुख्यमंत्री विष्णुदेव साय गुजरात के गांधीनगर के NAMTECH संस्थान के भ्रमण करिन। ये संस्थान मैन्युफैक्चरिंग, इंजीनियरिंग अउ टेक्नोलॉजी के पढ़ई ला नवा अउ आधुनिक तरीका म सिखाय बर जाना जाथे।
मुख्यमंत्री साय कहिन कि गुजरात महात्मा गांधी अउ प्रधानमंत्री नरेंद्र मोदी के पावन धरती आय, जेन ह देश ला विकास, आत्मनिर्भरता अउ नवाचार के संदेश दे हावय। मुख्यमंत्री कहिन कि ओ मन चाहथें छत्तीसगढ़ म घलो अइसन संस्थान बने, जिहां के युवामन ला आधुनिक तकनीक अउ औद्योगिक प्रशिक्षण के अवसर मिले।
मुख्यमंत्री कहिन कि राज्य सरकार युवामन ला स्वरोजगार, तकनीकी ज्ञान अउ उद्योग मन ले जोड़े के दिशा म तेजी ले काम करथे।
मुख्यमंत्री साय ह कॉलेज पहुँचके पढ़ई के तरीका, आधुनिक लैब (प्रयोगशाला) अउ तकनीकी सुविधा ला ध्यानपूर्वक देखिन। ओह छात्र मन ले बात घलो करिन अउ जानिन कि वो मन कइसने प्रोजेक्ट अउ मशीन म काम करके व्यावहारिक ज्ञान ला सीखथें। मुख्यमंत्री ह लइका मन ले उनकर अनुभव अउ भविष्य के योजना ऊपर चर्चा घलो करिन।
मुख्यमंत्री साय कहिन कि अब राज्य के आईटीआई कॉलेज मन ला नवा रूप म विकसित करे जाही, ताकि युवामन ला स्मार्ट मैन्युफैक्चरिंग, रोबोटिक्स अउ ऑटोमेशन जइसने नई तकनीक के जानकारी मिल सके। आने वाला समय म छत्तीसगढ़ के कॉलेज मन म आधुनिक मशीन अउ डिजिटल प्रशिक्षण सुविधा शुरू होही, ताकि छात्र मन पढ़ई के संग-संग वास्तविक काम के कौशल घलो विकसित कर सकही।
NAMTECH कॉलेज के प्रबंधन ह मुख्यमंत्री साय ला बताइन कि गुजरात म ओ मन एक अइसन मॉडल अपनाइस हें, जेन म कॉलेज मन ला आपस म जोड़के पढ़ई ला अउ बढ़िया अउ असरदार बनाय गे हे। छात्र मन नई तकनीक सीखके अब सीधे उद्योग म काम करे लायक हो गे हें। कॉलेज प्रबंधन ह ए घलो बताइस हें कि ओ मन छत्तीसगढ़ म घलो एही तरीका ले सहयोग करे बर तैयार हें, ताकि राज्य के आईटीआई कॉलेज मन आधुनिक बने सकें।
योजना येहे कि कुछ कॉलेज मन ला जोड़के नेटवर्क मॉडल बनाय जाही, जिहां एक कॉलेज नई तकनीक म निपुण होही अउ वो ह दूसर कॉलेज मन ला घलो ए ज्ञान देही। ए नवा मॉडल लागू होए के बाद छत्तीसगढ़ म हर बछर करीब 10,000 ले जियादा युवामन ला आधुनिक तकनीक अउ उद्योग से जुड़ई के प्रशिक्षण मिल सकही।
ए योजना ले छात्र मन ला पढ़ई के संग वास्तविक काम के अनुभव घलो मिलही। ओ मन मशीन, ऑटोमेशन अउ नई इंजीनियरिंग तरीका के गहराई ले समझ सकहीं। ए तरीका ले ओ मन ला रोजगार के बढ़िया अवसर मिलही अउ देश के बड़े औद्योगिक प्रोजेक्ट म काम करे बर तैयार होहीं।
मुख्यमंत्री साय कहिन कि विकसित भारत 2047 के सपना ला पूरा करे म छत्तीसगढ़ के भूमिका बहुत महत्व रखथे। ओ कहिन- “युवा छत्तीसगढ़ के सबसे बड़े ताकत हें। छत्तीसगढ़ अब अइसने युवामन ला तैयार करत हे, जेन ह नई सोच अउ आधुनिक तकनीक के संग विकसित छत्तीसगढ़ अउ विकसित भारत के दिशा म आगू बढ़ही।”
ए मउका म मुख्यमंत्री के प्रमुख सचिव सुबोध सिंह, मुख्यमंत्री के सचिव राहुल भगत, उच्च शिक्षा अउ कौशल विकास विभाग के सचिव एस. भारतीदासन सहित अनेकों अधिकारी उपस्थिति रहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।