बिहान ले समाज म आवथे जागृति, खुलत हावयं विकास के रद्दा : विधायक श्रीमती छन्नी साहू

बिहान ले समाज म आवथे जागृति, खुलत हावयं विकास के रद्दा : विधायक श्रीमती छन्नी साहू

अंजोर.राजनांदगांव। जनपद पंचायत छुरिया के सरकारी उच्चतर माध्यमिक स्कूल प्रांगण म राष्ट्रीय ग्रामीण आजीविका मिशन योजना ले महिला समूह के खातिर बिहान मेला के आयोजन करे गिस। बिहान मेला के आयोजन जिला प्रशासन अउ कलेक्टर डोमन सिंह के मार्गदर्शन अउ अगुवई म करे गिस। बिहान मेला म आज देर तक रौनक रेहे अउ इहां लगभग 7 हजार ले जादा लोगन ह लुत्फ उठाइस। बिहान मेला म 30 महिला समूह ह स्टाल के माध्यम ले अपन इहां उत्पादित सामान के प्रदर्शनी अउ बिक्री करिस। बिहान मेला के आयोजन होए ले 1730 महिला समूह के अपन जिनिस के प्रदर्शनी अउ बिक्री के खातिर एक बेहतरीन प्लेटफार्म मिलिस।

मेला म समूह के महिला मन के लगभग 2 लाख 18 हजार रूपिया के जिनिस के बिक्री होइस। इहां पहुंचिस खुज्जी विधायक श्रीमती छन्नी साहू अउ कलेक्टर डोमन सिंह, जिला पंचायत सीईओ अमित कुमार ह महिला समूह के स्टाल म पहुंच के महिला समूह डहर ले उत्पादित सामान के अवलोकन करिन। ए बखत खुज्जी विधायक श्रीमती छन्नी साहू ह किहिन के समूह के महिला मन के प्रयास ले समाज म जागृति आती हावय। महिला मन के अग्रणी भूमिका म आगू आने ले विकास के रसता खुलती हावय। ओमन महिला समूह के उंकर ए प्रयास के खातिर अपन सुभकामना दी।

कलेक्टर डोमन सिंह ह महिला समूह के बढ़ई करत किहिन के समूह के महिला मन के डहर ले काफी अच्छा प्रयास करे गे हावय। समूह के महिला मन डहर ले करे जा रिहिन बुता समाज के खातिर प्रेरणादायक हावयं। कलेक्टर ह किहिन के महिला समूह जागरूक होके समाज म आगू बढ़त हावयं। महिला मन के प्रयास ले समाज म नए-नए आयाम बनत हावयं अउ विकास के आगाज होवत  हावय। ए बखत कलेक्टर ह महिला समूह के प्रेरित करत किहिन के अपन जिनिस के संग-साथ आन समूह के जिनिस के तको अवलोकन करें। जेकर ले एक आन के जिनिस के समझे अउ आगू बुता करे के प्रेरणा मिलही। ओमन किहिन के जिला प्रशासन डहर ले महिला स्वसहायता समूह के प्रोत्साहन दे के खातिर विकासखंड स्तरीय बिहान मेला के आयोजन करे जात हावय। जिला पंचायत सीईओ अमित कुमार ह बताइन के बिहान मेला के खातिर राष्ट्रीय ग्रामीण आजीविका मिशन डहर ले अच्छा बुता करे गिस। 21 दिसम्बर के डोंगरगढ़ म बिहान मेला के आयोजन करे जाही। जिला म सबो विकासखंड म बिहान मेला के आयोजन होही। ए बखत एसडीएम डोंगरगांव सुनिसल नायक उपस्थित रिहिन।

बिहान मेला म मोबाईल मेडिकल यूनिट के माध्यम ले 210 मरीज मन के स्वास्थ्य परीक्षण करे गिस। खासकर महिला मन ह बड़का संख्या म अपन स्वास्थ्य परीक्षण कराया। बीपी, शुगर सहित सर्दी, खांसी बुखार, मलेरिया के जांच के गे। संग ही जरूरी दवई अउ जरूरी सलाह तको दे गिस। महिला मन ह मोबाईल मेडिकल यूनिट के एक अच्छा योजना बताइन। बिहान मेला म आज 17 महिला समूह के एनआरएलएम योजना ले 64 लाख रूपिया के करजा स्वीकृति के चेक बांटे करे गिस। विधायक श्रीमती साहू ह समूह के महिला मन के चेक अउ प्रशस्ति पाती बांटिस। बिहान मेला म आने-आने क्षेत्र म उल्लेखनीय बुता करे वाले, पैरा दान, वर्मी उत्पादन, आदर्श गौठान, स्वसहायता समूह के जिनिस के बिक्री अउ बैंक सखी के क्षेत्र म उत्कृष्ट बुता करे वाला महिला समूह के चिन्हारी चिनहा भेंट करके सम्मानित करे गिस। जानबा हावय के बिहान मेला म समूह के महिला मन डहर ले टेंट लगाये गे अउ माईक के बेवस्था तको करे गिस।

बिहान मेला म महिला समूह डहर ले उत्पादित सामान आकर्षण के केंद्र रिहिन। महिला समूह डहर ले छत्तीसगढ़ी व्यंजन के स्टाल लगाये गिस। इहां आने वाला लोगन ह व्यंजन के लुत्फ उठाया। आज इहां माला आजीविका संकुल संगठन छुरिया डहर ले हल्दी मिरचा धनिया पाउडर के स्टॉल लगाया। इही रकम ले पदम मोंगरा स्वसहायता समूह कल्लू बंजारी डहर ले मिठाई, नव इच्छा स्वसहायता समूह कल्लू बंजारी डहर ले दाल बड़ी, ज्योति कलश स्वसहायता समूह आटरा डहर ले बाड़ी म उत्पादित जाम, पदम नवदुर्गा स्व मदद समूह मासूल डहर ले जिमीकंद, जागृति महिला स्वसहायता समूह लाममेटा डहर ले स्टेशनरी सामग्री, पदम मां शीतला स्वसहायता समूह दुवार  फैंसी दुकान, जय अंबे स्वसहायता समूह दीवानटोला डहर ले कपड़ा दुकान, मां धनेश्वरी स्वसहायता समूह हाले कोसा डहर ले सब्जी, मां बम्लेश्वरी दुर्गा स्वसहायता समूह कीरगाहाटोला डहर ले गुपचुप  ठेला, दीक्षा स्व मदद समूह मेटेपार डहर ले अंडा रोल, वृंदावन स्व मदद समूह पाटेकोहरा के डहर ले होटल, जय मां सरस्वती स्वयं मदद समूह पाटेकोहरा के डहर ले बांस ले उत्पादित सामग्री, पूजा स्वसहायता समूह पाटेकोहरा के डहर ले गुपचुप दुकान, जय मां दुर्गा स्वसहायता शिकारीटोला के डहर ले चप्पल दुकान, मां गायत्री स्व मदद समूह मकरधौकरा के डहर ले सब्जी, मां अंबे स्व मदद समूह रानी तरिया के डहर ले बैग दुकान, मां गौरी स्व मदद समूह महाराजपुर के डहर ले सब्जी, मां सरस्वती स्वसहायता समूह जोबा के डहर ले जिमीकंद, महाशक्ति स्वसहायता समूह जोबा के डहर ले चिरायता, मां शारदा स्वसहायता समूह तेलीनबांधा के डहर ले मुर्रा लड्डू जइसे जिनिस के बिक्री महिला समूह डहर ले लगाये गे। ए मउका म राष्ट्रीय ग्रामीण आजीविका मिशन के डीपीएम उमेश तिवारी अउ उंकर टीम उपस्थित रिहिस।