मेकाहारा के औचक निरीक्षण करिन स्वास्थ्य मंत्री टीएस सिंहदेव, दिस जरूरी निर्देश

अंजोर.रायपुर। प्रदेश के स्वास्थ्य मंत्री श्री सिंहदेव ह आज राजधानी के सबले बड़का अस्पहताल म अचानक पहुंचगे। मंत्री के अस्पताल पहुंचते ही डॉक्टर अउ अधिकारी मनके टीम तको जुरियागे। ये मउका ओमन अस्पताल के स्वास्थ्य सुविधा के जायजा लेवत परिसर के तको आवलोकन करिन। डॉक्टर अउ कर्मचारी मनले गोठबात करके ओमन अधिकारी मनला तको जरूरी निर्देश दे हावय।

आगू ओमन राजधानी के एक निजी चैनल के कार्यक्रम म सामिल होवत कोरोना ले सचेत रेहे खातिर गोल बाजार के बेपारी मनले गोठबात करिन। तेकर पाछू न्यू सर्किट हाउस, रायपुर म आयोजित राज्य पर्यवेक्षक मंडल के बइठक म सामिल होइन। ये मउका म ओमन सम्बंधित अधिकारी मन सो महत्वपूर्ण विषय म चर्चा करत कन्या भ्रूण हत्या रोके अउ राज्य के लिंगानुपात म संतुलन खातिर जागरूकता फैलाये बर प्रेरित करिन।