धान खरीदी खातिर पंजीकृत किसान मनके डेटा अद्यतन 31 अक्टूबर तक, नवा किसान के तको होही पंजीयन

अंजोर.रायपुर,13। एसो के धान खरीदी खातिर पंजीकृत किसान के डेटा अद्यतन के बुता ह 17 अगस्त ले सुरू होगे हाबे जेहा अब 31 अक्टूबर 2020 तक चलही। जे किसान मन खरीफ म पंजीकृत हाबे ओमन ल फेर कराये के जरूरत नइये। मिले आरो के मुताबिक नवा किसान के पंजीयन तहसील मॉडयूल के माध्यम ले तहसीलदार कोति ले करे जावत हाबे। सरकार कोति ले किसान मनके रकबा ले अनुपयोगी बंजर भूमि, पड़त भूमि, नदी-नाला के भूमि, निजी तालाब, डबरी के भूमि, कृषि उपयोग खातिर बने कच्चा-पक्का शेड ल पंजीयन म कम करे जावत हाबे। गिरदावरी के काम राजस्व विभाग कोति ले समय म करके पंजीयन बर डेटा उपलब्ध कराये जाही। गिरदावरी के समय सबो कृषक ले आधार अउ मोबाइल नंबर तको मांगे गे हावय।