अंजोर.रायपुर। देशव्यापी कोविड-19 टीकाकरण अभियान के तहत आज ले छत्तीसगढ़ म तको टीका लागये गिस। जेमा पहिली चरण म स्वास्थ्य कर्मी मनला लगाये जात हावय। मिले आरो के मुताबिक रायपुर के पंडित जवाहर लाल नेहरू स्मृति चिकित्सा महाविद्यालय म मेडिकल कॉलेज ऑपरेशन थिएटर बुता करइया स्वास्थ्य कर्मी श्रीमती तुलसा तांडी ल पहिली कोविशील्ड वैक्सीन के टीका लगाये गिस। पंडरी जिला चिकित्सालय म हेमन्त दुबे ल अउ एम्स रायपुर म डायरेक्टर डॉ. नितिन नागरकर ल पहिली टीका लगाये गिस।
टीकाकरण अभियान शुरू होए के पहिली दिल्ली ले भारत के प्रधानमंत्री नरेन्द्र मोदी ह वीडियो कॉन्फ्रेंसिंग के जरिए जुड़के ओमन विश्व के सबले बड़का टीकाकरण अभियान जेन भारत म तको शुरू करे जात हावय, तेकर बारे म विस्तार ले जानकारी दीस। ये मउका म ओमन हर प्रदेशवासी सहित मेडिकल वर्कर्स ल शुभकामना दीस।
राजधानी रायपुर म पांच केन्द्र म आज टीकाकरण के शुभारंभ करे गिस। जेमा एम्स, पंडित जवाहर लाल नेहरू स्मृति मेडिकल कॉलेज, जिला अस्पताल पंड़री, एनएचएमएमआई हॉस्पिटल अउ मिशन हॉस्पिटल तिल्दा शामिल हाबे। मुख्य चिकित्सा अउ स्वास्थ्य पदाधिकारी रायपुर श्रीमती डॉ. मीरा बघेल के बताये मुताबिक हरेक टीकाकरण केन्द्र म 100-100 हितग्राही ल टीका लगही, जिकर मनके नाम पहिली ले कोविन पोर्टल म दर्ज हावय। टीकाकरण खातिर टीकाकरण केन्द्र म दू वैक्सीनेटर, दू निगरानीकर्ता, दू रिकार्ड जॉच कर्मी, सुरक्षा कर्मी, मोबलाईजर अउ टीकाकरण केन्द्र खातिर नोडल अधिकारी मनके ड्यूटी लगाये गे हावय। कोविड-19 वैक्सीन हितग्राही ल लगे के बाद 30 मिनट तक आब्जरवेशन (निगरानी) कक्ष म बइठाये जाही। ये बखत कोनो प्रकार के एडवर्स ईवेन्ट होए के स्थिति म तुरते प्राथमिक ईलाज शुरू करत मरीज ल जिला अस्पताल, मेडिकल कॉलेज हास्पिटल म रिफर करे के बेवस्थार करे गे हावय। 108 एम्बुलेन्स ल एलर्ट म रखे गे हावय। निगरानी कक्ष म चिकित्सक, आरएमए अउ प्रशिक्षित नर्सिग स्टॉफ के ड्यूटी लगाये गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।