विपक्ष मांगिस टीकाकरण म चर्चा खातिर समय, मुख्यमंत्री किहिस स्वागत हावय

अंजोर.रायपुर, 8 मई 2021। सत्तापक्ष के जतका जिम्मेदारी अउ जवाबदेही होथे ओतके विपक्ष के तको, फेर कुछ दिन ले अइसे देखे बर नइ मिलत रिहिस। विपक्ष माने विरोधी दल जेन सरकार के हर बात के विरोध करय उहंचे सत्ता पक्ष ह विरोधी मनके बात नइ सुनना। अइसे परंपरा के बीच छत्ती‍सगढ़ म विपक्ष ह कोरोना महामारी के दौर म सरकार ले चर्चा करे खातिर चिट्टी पठोय हाबे। जेमा प्रदेश के मुखिया ह खुशी जाहिर करत किहिन के स्वागत हावय, लोकतंत्र के खूबी ही संवाद आए जेमा सदैव विश्वास रखथवं। कोरोना के ये माहौल म सबो जनप्रतिनिधि वर्चुअल माध्यम ले बइठ करबोन। मैं अपन कार्यालय ले कहूं के वो आप मनले सम्पर्क करके वर्चुअल बैठक आयोजित करही।

मिले आरो के मुताबिक भारतीय जनता पार्टी के प्रदेश अध्यक्ष के विष्णुदेव साय जी के नेतृत्व म वरिष्ठ भाजपा नेता मनके प्रतिनिधिमंडल मुख्यमंत्री भूपेश बघेल ले मिलना चाहत हावय। पाती म धरमलाल कौशिक, बृजमोहन अग्रवाल, अजय चंद्राकर, सुनील सोनी के नाव सामिल हावय। भाजपा ये प्रतिनिधिमंडल मुख्यमंत्री भूपेश बघेल ले मिलके कोविड-19 अउ वैक्सीनेशन के मुद्दा म पार्टी के चिंता अउ सुझाव म चर्चा करके प्रदेश सरकार ले ये महामारी के संबंध म जादा संवेदनशील होके काम करने के आग्रह म ज़ोर देही।